Thursday, June 10, 2010

Bhookh





"Chai garam" keh kar usne glass meri table par rakha tha..
Sahar se kaaphi door us chote se badhaal dhaabe ki woh jaan tha..

Kariban 7 saal ka 'Lakhan' us dhaabe ka hi nahin pure ilaake ki shaan tha..
Par us hanste khelte chehre ke peeche ka dard uske aaine samaan aankhon mein dikha tha mujhe...
Kuch minton tak uspar nazar gar gayi thi meri 
"Chai ke saath biscut lengi kya?" usne apne andaaz mein poocha tha...
Uska bholapan aur badbolapan donon hi chu gaya tha mujhe
Mere kuch bolne se pehle hi woh biscuit ka packet table par rakh gaya tha...


'Tum padhte bhi ho?' maine anayaas hi pooch liya tha...
'Haan, padhta tha' keh kar woh chup ho gaya tha
Par uski aankhon mein umad aaye aansun sab bayan kar gaye the...
Tabhi maalik ki awaaz sunkar bhaaga tha woh...


Chai ki chuskiyaan lete hue aise hazaaron 'Lakhan' ke dhoomil bhavisya ka khayal man mein aaya tha
Us chote se bachhe ka huasla aur zazba aur har ek grahak se uski baatchit kaafi dilchasp thi
Apni meethi meethi baaton se use sab ka man mohna bhi aata tha 
Is choti umra mein itni paripakwata dekh main dang thi...

Pyaale ki chai ka khatm hona yeh sanket tha ki ab mujhe apni manzil ki taraf badhna tha...
Jaate samay counter par paise dete waqt woh bartanon ke dher ke beech mila tha 
Par chehre par zara bhi shikan na thi, hansi barkaraar thi...

Maine jaate jaate use apne pass bulaya tha, haath dhokar woh jhatpat dauda chala aaya tha 
Ek chocolate pakda kar maine usse poocha tha  "Mere saath sahar chalega?? padhai karega??
Par shayad uski zaroorat ka andaaza mujhe abhi tak nahin hua tha...

Woh chupchaap thodi der khada raha tha 
Is baar aansun uske aankhon ke kinaare se raasta dhoondh bahar nikal aaye the
Aur woh sehma hua sa bola tha...
"Kya tum mujhe roz pet bhar khaane ko doge??"





Note: Through this poem I would like to request all of you who might have come across several such lakhan in your daily lives too, to vow that you will take a step to eradicate Child Labor from our society...This evil can only be eradicated when the educated lot like us will be aware and join hands...So let us all raise our voice against the atrocities faced by children...Stop Child Labor!!!